GALICIA CELEBROU A I XORNADA DE RESIDENTES DE ENFERMARÍA FAMILIAR E COMUNITARIA
Santiago de Compostela, 29 de Maio do 2015
O acto organizado pola Asociación Galega de Enfermaría Familiar e Comunitaria este venres no salón de actos da Consellería de Sanidade foi valorado de éxito rotundo.
O acto comezou ás 11 da mañá de man do ex-Presidente da AGEFEC, Manuel Vidal Fernández Fernández que salientou a necesidade de especialistas de familia e comunitaria así como o recoñecemento a tódalas persoas implicadas na posta en marcha das unidades docentes que forman a estes enfermeiros especialistas, seguido do actual Francisco Jesus Represas Carrera e a Subdirectora Xeral de Programación e Planificación Asistencial da Dirección Xeral de Asistencia Sanitaria, Dna. Teresa Queiro Verdes, que acudía en representación da Consellería de Sanidade. A representante de Sanidade destacaba o papel que ten que xogar a Atención Primaria como eixo vertebrador da asistencia, que cobrará máis forza nas estratexias 2020 así como o cada vez máis importante e relevante dos Enfermeiros e Enfermeiras de Familia e Comunitaria. A mesa inaugural foi clausurada por Dna. Susana Mirás Carballal, Presidenta do Comité organizador.
Na mesa da especialidade en Enfermaría Familiar e Comunitaria e inserción laboral, os diferentes representantes das organizacións sindicais expuxeron a súa visión da situación e a dificultade do reto que se ten entre mans. Foi unha mesa cun debate moi participativo no que o público coincidiu en que o reto era complexo e non se podía quedar na parálise pola análise e se debía poñer solución a un problema no que sempre se debían antepoñer os intereses dos pacientes.
Susana Mirás presentou aos novos residentes e destacou que tanto residentes como especialistas “teñen que ser moi proactivos e se ven áreas que mellorar non agardar a que ninguén llo pida, se non que tomen a iniciativa e o leven a cabo”, frase que resume moi ben o papel proactivo dos Enfermeiros e Enfermeiras de Familia e Comunitarios.
A continuación expuxeron os estudos de investigación que levaron a cabo durante a residencia os novos Enfermeiros especialistas en Familiar e Comunitaria.
Álvaro Carrera, falou da relación entre o nivel de actividade física e os factores de risco cardiovascular, Belén Gómez sobre a prevalencia e a calidade de vida dos coidadores informais de persoas dependentes maiores de 65 anos, Ana Sáez sobre o coñecemento e a opinión das Enfermeiras de Atención Primaria sobre as terapias alternativas e complementarias, Mª Belén Vara, sobre a relevancia da avaliación da técnica de inxección de insulina e Sabela Muíño sobre as prestacións de Atención Domiciliaria por parte das Enfermeiras de Primaria e o perfil dos usuarios receptores deste servizo.
Da man de Ignacio Couselo tivo lugar a mesa na que falaron Carmen Abeledo titora en Pontevedra e Herminia Ramil titora na Coruña do gran papel que xoga o titor na formación dos futuros especialistas, así como criterios de avaliación e métodos pedagóxicos.
Ángel Alfredo Martínez Ques, en calidade de Presidente do Comité Científico procedeu a lectura de conclusións no que fixo fincapé na importancia da investigación enfermeira na atención primaria de saúde facendo relevancia das conclusións das investigacións dos novos especialistas.
O acto finalizou coa entrega do premio a mellor comunicación por parte de Manuel Vidal Fernández a Belén Gomez Castro, e así como diferentes agasallos aos novos especialistas en Enfermaría Familiar e Comunitaria
Dende a Sociedade Científica AGEFEC queremos mostra-lo noso máis fondo agradecemento a Consellería de Sanidade pola súa colaboración incondicional, así como aos membros dos comités organizador e científico por acadar este éxito na primeira edición.
Tamén queremos agradecer a implicación de tódalas persoas que participan na formación dos residentes, que agocha detrás un duro traballo moi importante pouco recoñecido.
Non están permitidos os comentarios.