O Grupo de Promoción da Especialidade de Enfermaría Familiar e Comunitaria  de AGEFEC ten entre os seus obxectivos específicos dar a coñecer a especialidade e o seu programa formativo no ámbito das universidades. Con esta fin ofertouse a tódalas universidades de enfermaría galegas a realización de sesións informativas que acheguen aos alumnos a experiencia formativa EIR.

Froito desta proposta tivo lugar o pasado 13 de marzo 2014, na Escola de Enfermaría de Povisa (Vigo) a primeira sesión informativa dirixida aos alumnos de 2º curso. Durante a sesión, tratáronse dende aspectos xerais, como o desenvolvemento normativo das distintas especialidades ou o acceso á formación especializada, ata aspectos máis concretos como o desenvolvemento do programa formativo nas Unides Docentes galegas e a situación actual da especialidade na nosa comunidade, tanto a nivel formativo como de expectativas laborais.

A valoración por parte do alumnado tanto do contido como da forma en que se expuxo e desenvolveu a sesión foi positivo, segundo se recolleu na enquisa de satisfacción que se pasou ao remate da sesión, considerando ademais que a información achegada é útil para o seu desenvolvemento profesional. Os poñentes, pola nosa parte, tamén valoramos esta experiencia como enriquecedora e positiva xa que nos permitiu coñecer as opinións e suxerencias dos futuros profesionais, todo dentro dun ambiente distendido e de cordialidade grazas aos responsables do centro e aos propios alumnos.