AGEFEC e Sindicatos reclaman a inmediata contratación temporal dos Enfermeiros Especialistas en Familiar e Comunitaria

2019

19 Abril, 2017

A Asociación Galega de Enfermaría Familiar e Comunitaria (AGEFEC) compareceu conxuntamente cos sindicatos CIG, CCOO, CSIF e UXT para solicitar ao SERGAS a apertura inmediata dos listados de selección temporal dos Enfermeiros Especialistas en Familiar e Comunitaria e a operatividade das mesmas para este 2017.

Ante a situación desoladora e de extrema gravidade na que se atopan os Enfermeiros Especialistas en Familiar e Comunitaria, na que non se lles recoñece a especialidade nos cadros de persoal do SERGAS, a Sociedade Científica que representa aos Enfermeiros de Atención Primaria de Galicia, xunto as organizacións sindicais con representación na Mesa Sectorial de Sanidade da Xunta de Galicia e SERGAS (CIG, CCOO, CSIF e UXT), veñen de reclamar ao Conselleiro de Sanidade, ao Xerente e a Directora Xeral de RRHH do Servizo Galego de Saúde a apertura inmediata dos listados de selección temporal dos Enfermeiros Especialistas en Familiar e Comunitaria e a operatividade das mesmas para este 2017.

Nesta comparecencia conxunta, o Presidente da AGEFEC, arroupado polos dirixentes sindicais destacou que “Hoxe é un día triste. É lamentable que unha sociedade científica teña que estar aquí hoxe xunto ás organizacións sindicais para reclamar algo que nunha Administración con sentido común teríase feito de inmediato.”

O representante deste colectivo de Atención Primaria, puxo como exemplo a outras administracións sanitarias do Estado, como a asturiana, a castelán-leonesa, etc. que si teñen en consideración a especialidade para amortizar este esforzo económico e humano dos servizos de saúde.

Segundo Represas, “hoxe estamos aquí para denuncia-lo trato impresentable, o menosprezo, a discriminación e o despilfarro de recursos públicos que a administración sanitaria galega está realizando cos enfermeiros e enfermeiras especialistas en familiar e comunitaria”.

Así mesmo, fixo mención á reivindicación dos titores galegos nas misivas que enviaron fai unhas semanas ao Conselleiro denunciando esta situación.

Para o Presidente da AGEFEC e as organizacións sindicais: “a pelota está no tellado do SERGAS. Xa non valen escusas. Xa non vale utilizar a burocracia para retorcer un proceso simple e claro. Os especialistas queremos feitos. Queremos un trato digno e igualitario que os especialistas en Saúde Mental e Traballo. Reclamamos a apertura de listas xa, con efectos neste ano”.

Dende a Asociación Galega de Enfermaría Familiar e Comunitaria (AGEFEC) como tamén dos propios titores que forman aos especialistas, queremos agradecer ás organizacións sindicais que lideraron esta iniciativa nos órganos de negociación do Servizo de Saúde, a súa implicación cos especialistas en Enfermaría Familiar e Comunitaria e agardamos que o SERGAS, ante as reclamacións de tódolos axentes sociais, desbloquee esta situación e amortice o investimento e formación realizada neles.

Fixéronse eco desta noticia: