As sociedades científicas galegas de Atención Primaria rexeitan os criterios empregados polo SERGAS no concurso de traslados de Enfermaría
A Atención Primaria de Saúde é unha área específica que require dunha inversión estratéxica, garantindo a dispoñibilidade daqueles profesionais do sistema de saúde coa maior formación e experiencia específica, xa que, do seu nivel de desenvolvemento depende a viabilidade do noso sistema sanitario.
Segundo a Organización Mundial da Saúde (OMS), os sistemas sanitarios que teñen unha Atención Primaria ben desenvolvida, son moito máis eficientes e acadan mellores resultados de saúde, existindo unha forte evidencia entre o nivel de desenvolvemento da Atención Primaria e unha mellor saúde dos cidadáns, menor número de ingresos hospitalarios evitables e maior equidade.
Non é posible na actualidade, entende-lo avance da Atención Primaria de Saúde galega sen o desenvolvemento da especialidade de Medicina Familiar e Comunitaria e do traballo realizado polos Enfermeiros e Enfermeiras dende o seu comezo. Pero a pesares dos bos resultados obtidos co actual modelo de Atención Primaria, a Administración sanitaria resístese a implantar a especialidade de Enfermaría Familiar e Comunitaria. Desde o ano 2011 o Servizo Galego de Saúde (SERGAS) leva gastado recursos económicos e humanos en formar a máis de 100 profesionais nesta especialidade enfermeira, que a día de hoxe desaproveita incomprensiblemente.
O traballo das Enfermeiras e Enfermeiros de Atención Primaria require hoxe en día a maiores da formación básica xeral que se adquire na universidade, dunha formación superior e regrada, para a adquisición de competencias, coñecementos e habilidades que se adquiren mediante a Formación Sanitaria Especializada en Enfermaría Familiar e Comunitaria, ou mediante unha longa traxectoria na Atención Primaria acompañada de formación continuada específica, como é o caso de tódolos profesionais enfermeiros pendentes da obtención do título de especialista mediante o acceso por exame extraordinario.
Entendemos no contexto actual, cunha poboación moi envellecida, con altas prevalencias de patoloxías crónicas concomitantes e dependencia, que a Atención Primaria de Saúde precisa de profesionais médicos e enfermeiros especializados en Atención Familiar e Comunitaria para facer fronte a esta realidade.
O SERGAS publicou as bases do concurso de traslados aberto e permanente, as cales reflexan a totalidade de prazas vacantes da categoría de Enfermeiro/a na Atención Primaria. Rexeitamos que nas bases do concurso de traslados non se teña en conta nin a experiencia, nin a formación específica no ámbito da Atención Primaria, considerando como mérito case exclusivo a antigüidade, baremo que ao noso xuízo non segue os principios de igualdade, mérito e capacidade. Non é entendible que no século XXI unha organización da magnitude do Servizo Galego de Saúde, dirixa a mobilidade interna dos seus postos simplemente por “trienios” sen considerar factores como son a competencia, adecuación, experiencia e coñecemento. Consideramos que esta medida, non está centrada nos intereses dos usuarios do sistema sanitario galego.
Estes traslados contribúen a descapitalización da Atención Primaria de Saúde, dado que a inmensa maioría dos/as Enfermeiros/as que chegarán a Atención Primaria non posúen unha formación especializada e non adquiriron previamente as competencias avanzadas necesarias para desenvolver a súa labor con seguridade e calidade no ámbito da Atención Primaria.
As Sociedades Científicas Galegas de Atención Primaria que asinamos o presente documento, solicitamos a Consellería de Sanidade así como ás organizacións e axentes sociais responsables destes traslados:
- Que se modifique o actual baremo de traslados dando o peso principal á formación e a experiencia na Atención Primaria de Saúde, en especial aos profesionais que cumpriron os requisitos para a solicitude da obtención do título de especialista en Enfermaría Familiar e Comunitaria mediante exame extraordinario, respectando deste xeito os principios de igualdade, mérito e capacidade.
- A reconversión de prazas de Enfermeiro/a de Atención Primaria en Enfermeiro/a Especialista en Enfermaría Familiar e Comunitaria en función do número de especialistas dispoñibles, de xeito que se garanta a amortización do investimento realizado na súa formación. Ademais de ser unha garantía da mellora da calidade dos coidados e da carteira de servizos da Enfermaría de Atención Primaria, o que beneficiará aos usuarios do Sistema Público de Saúde Galicia.
Asociación Galega de Enfermaría Familiar e Comunitaria (AGEFEC)
Asociación Galega de Medicina Familiar e Comunitaria (AGAMFEC)
Asociación Española de Médicos de Atención Primaria – Galicia (SEMERGEN Galicia)
Sociedade Española de Médicos Xerais e de Familia – Galicia (SEMG Galicia)
Non están permitidos os comentarios.