A sociedade científica que agrupa as enfermeiras de atención primaria pide melloras a Sanidade para a xestión da campaña de vacinación antigripal.

Tal e como viñamos alertando dende o colectivo enfermeiro de atención primaria, a campaña deste 2020 ía requirir máis persoal e medios, especialmente no que atinxe a loxística e a distribución. Así foi requirido por esta Sociedade Científica antes do inicio da campaña tanto o incremento de enfermeiras como a mellora da loxística e distribución diaria de vacinas.

A partires da segunda semana da campaña (do 19 de outubro en diante) comezaron as incidencias na subministración de vacinas aos centros de saúde. Estes desabastecementos viñeron condicionados por varios factores:

1. Incremento da demanda da vacina polos colectivos de risco en relación coa situación pandémica e tamén da forte campaña de concienciación social da vacinación fronte a gripe.
2. Falta de claridade por parte das autoridades públicas a hora de explicar quen constitúen os grupos de risco.
3. Mensaxes contraditorias a través dos medios de comunicación sobre quen se debe vacinar.
4. Planificación inadecuada, xa que se seguiu o mesmo sistema de provisión de vacinas en base aos datos de vacinación do ano anterior, sen ter en conta a forte campaña informativa realizada nin a opinión das enfermeiras de atención primaria, que xa viñamos detectando en agosto interese e demanda por parte da poboación.
5. Incorrecta planificación da loxística no que atinxe aos días de subministración aos centros de saúde (3 días por semana ao comezo da campaña e 2 días dende esta semana) ligado a capacidade limitada de almacenamento en óptimas condicións nos centros de saúde.
6. Poboación pertencente a grupos de risco, convivintes dos mesmos e profesionais de risco, que noutros anos rexeitaban vacinarse e este ano demandan a vacina antigripal.

Esta situación xerou listas de espera de 2 e 3 semanas para poder vacinarse ou máis, feito que non representa maior transcendencia dende o punto de vista epidemiolóxico da gripe, pero si xera unha destacada preocupación e ansiedade na poboación.

Para o colectivo enfermeiro de atención primaria, sobre os que recae a campaña de vacinación, supón un importante trastorno no que é o curso normal da campaña vivir situacións de desabastecemento, xa que esta situación da lugar a unha sobrecarga de traballo innecesaria, a xa situación límite que estamos a vivir, pois implica que na medida das posibilidades temos que avisar a poboación para que non acuda e darlle unha nova cita (realidade que tamén repercute sobre o persoal de servizos xerais de admisión).

A maiores dos continuos cambios na organización da campaña que orixina o desabastecemento de vacinas, da lugar a que somos nós, as enfermeiras de Atención Primaria, as que temos que dar a cara ante a poboación – por un problema alleo a nós. Esta exposición ao público está dando lugar a un considerable incremento de violencia verbal cara as profesionais, situación que dende a Asociación Galega de Enfermaría Familiar e Comunitaria rexeitamos enerxicamente.

Por todo elo, dende AGEFEC facemos o seguinte chamamento:

En primeiro lugar á Administración para que melloren as canles de distribución e abastecemento de vacinas aos centros de saúde, que se teñan en conta as aportacións que realiza tódolos anos as enfermeiras para a mellora da campaña e que se habilite aos centros de saúde o acceso aos sistemas de mensaxería para permitir unha mellor comunicación cos usuarios.

Por último á poboación, que a campaña de vacinación antigripal se fai de xeito escalado, que haberá vacinas para tódolos pacientes en grupo de risco, que a situación epidemiolóxica non urxe a vacinación inmediata e que en caso de desabastecemento dos centros, a responsabilidade non é dos profesionais, E NON ESTÁ XUSTIFICADA BAIXO NINGUNHA CIRCUNSTANCIA A VIOLENCIA VERBAL NIN AS FALTAS DE RESPECTO que están a sufrir ultimamente debido a estas circunstancias.

Santiago de Compostela a 2 de novembro do 2020.