• Os representantes da AGEFEC trasladaron os datos do último informe de setembro da situación laboral á central sindical.
• Os datos revelan que hai preto de 600 especialistas en Enfermaría Familiar e Comunitaria traballando no sistema público de saúde de Galicia, pero só o 30% (apenas 180) teñen un vínculo estable na categoría de EFeC na Atención Primaria.
• AGEFEC trasladou a central sindical o feito de que máis de 400 profesionais estean traballando maioritariamente na Atención Hospitalaria, fóra do ámbito para o que foron formados, supón un claro e innegable problema de ordenación profesional, un menosprezo á Atención Primaria privándoa dos seus profesionais, e un conflito laboral de recorrido incerto.

A comitiva encabezada pola Presidenta da AGEFEC Belén González, o Vogal de Formación Continuada Damián Rodríguez e o asesor externo da Xunta Directiva Álvaro Carrera, reuníronse cos representantes da CIG, o Secretario Nacional Manuel Moreira e a Secretaria de Organización Ana Lestón. 

Os membros da AGEFEC, trasladaron a negra realidade dos datos á representación sindical, na que se evidencia o claro menosprezo á Atención Primaria, ás Enfermeiras/os especialistas en Enfermaría Familiar e Comunitaria e a dilapidación de recursos públicos en materia de persoal por parte do Servizo Galego de Saúde.

AGEFEC expuxo que os datos poñen de manifesto que a práctica totalidade dos especialistas está traballando actualmente no Servizo Galego de Saúde, pero en ámbitos de fóra da categoría profesional da Atención Primaria. Esta realidade é froito da mala planificación, na que se forman máis profesionais que prazas estruturais. Desperdiciando así un capital de 60.000€ por especialista (uns 25 millóns de € en formación).

Tamén se remarcou que segundo os novos criterios de acreditación de unidades docentes e centros de saúde docentes, a actual dotación de enfermeiras especialistas nos mesmos, pode dar lugar a que moitos perdan a acreditación para a docencia de EIR de Familia e Comunitaria e outros vexan mermadas o seu número de prazas a ofertar.

Dende AGEFEC propúxoselle a CIG a necesidade de apostar por un plan de choque estrutural para combater a situación actual, e logo progresiva coa creación de prazas segundo a capacidade das unidades docentes galegas (un total 50 especialistas/ano).

Este plan de choque debe consistir en dúas vertentes simultáneas:

• O desenvolvemento da disposición transitoria 2ª do decreto 81/2016, para a estabilización dos especialistas con fixeza na categoría de Enfermeiro/a de coidados xerais
• Unha OPE de estabilización do resto de profesionais.

Remarcouse moito a importancia de que ambos procesos fosen simultáneos e de que estas medidas de choque deben comprender a totalidade de profesionais dispoñibles, pois do contrario en pouco tempo pode desatarse un conflito laboral importante por esta cuestión.