73.064 galegos exerceron o seu dereito á libre elección enfermeira na Atención Primaria
- O pasado mes de agosto, cumprironse dous anos da entrada en vigor deste dereito para os usuarios do Servizo Galego de Saúde.
- A Asociación Galega de Enfermaría Familiar e Comunitaria (AGEFEC) considera que esta medida tivo un impacto positivo para os usuarios xa que agora poden escoller o profesional no que sintan maior confianza.
Dende agosto do 2015 para dar a coñecer este novo dereito dos galegos e galegas, recoñecido no Decreto 55/2015, do 26 de marzo, polo que se regula o exercicio do dereito á libre elección de persoal médico de familia, pediatra e persoal de enfermaría en atención primaria, e de centro ou complexo hospitalario por un problema de saúde novo, no Sistema público de saúde de Galicia, a Asociación Galega de Enfermaría Familiar e Comunitaria (AGEFEC) liderou unha campaña informativa baixo o lema “O teu dereito, a túa saúde. Elixe o teu enfermeiro/a” e a premisa “A confianza no profesional que te atende é fundamental”.
Segundo os datos facilitados pola Consellería de Sanidade, a 30 de setembro de 2017, producíronse nestes dous anos, 73.064 cambios de enfermeiro/a de familia, dos cales 62.929 producíronse dende o 31 de agosto de 2016, o que pon de manifesto que a maior implantación do dereito se levou a cabo neste segundo ano. Estes cambios de profesional, realizáronse mantendo unha absoluta normalidade na actividade asistencial nos Equipos de Atención Primaria, o que xustifica os cambios lexislativos feitos no seu momento para permitir que os cidadáns galegos poida escoller o seu enfermeiro/a de familia.
EOXI SERGAS | CAMBIOS DE ENFERMEIRO/A* |
A CORUÑA | 15.763 |
FERROL | 9.238 |
SANTIAGO | 8.981 |
LUGO-CERVO-MONFORTE | 6.667 |
OURENSE-VERÍN-BARCO | 8.686 |
PONTEVEDRA-SALNÉS | 8.038 |
VIGO | 15.691 |
TOTAL | 73.064 |
* Datos dende a entrada en vigor ata o 30 de setembro de 2017
A AGEFEC destaca que esta mellora permitiu e permite á poboación en xeral, ás familias e aos individuos en particular coñecer en todo momento a Enfermeira de referencia responsable dos seus coidados, o que da pé a mellora-lo proceso de comunicación Enfermeira-Paciente, incrementando a eficacia na continuidade de coidados en calquera proceso de saúde-enfermidade, feito que anteriormente se podía ver comprometido xa que o paciente non podía levar a cabo unha asignación concreta de Enfermeiro/a.
Pero dende a AGEFEC seguimos solicitándolle ao SERGAS:
- A necesidade de que realice os axustes necesarios nos aplicativos informáticos que permitan unha correcta e áxil aplicación deste dereito. Como por exemplo que dende a páxina web do SERGAS se poda realizar este trámite de forma electrónica. http://www.sergas.es/Tarxeta-sanitaria/Acceso-ao-cambio-de-enfermeiroa-(Con-Certificado-Dixital).
- Que os/as enfermeiros/as de atención primaria poidan coñecer e consultar o número de usuarios asignados o seu cupo.
Non están permitidos os comentarios.