A AGEFEC reclama o recoñecemento da formación sanitaria especializada e solicita a reconversión das prazas de enfermeira de Atención Primaria a prazas de especialista en Enfermería Familiar e Comunitaria
2 Setembro, 2022
Dado o inminente remate do período de formación dos e das residentes de Enfermaría Familiar e Comunitaria da promoción 2020-2022, a Asociación Galega de Enfermería Familiar e Comunitaria (AGEFEC) quere expoñer o seguinte:
- Un total de 34 enfermeiras especialistas no Servizo Galego de Saúde rematarán a especialidade tras dous anos de formación. Un número nada despreciable que, de non ofertar vacantes para especialistas, serán desviadas a outros servizos, desperdiciando, así, todo o invertido na súa formación.
- Na actualidade temos coñecemento de compañeiras galegas na mesma situación que están fora da comunidade soamente por mor da praza que obtiveron na elección para optar a formación sanitaria especializada (FSE), para as que sería un aliciente para voltar a Galicia.
- Tamén, enfermeiras especialistas que están fora da comunidade pola escasa saída profesional das bolsas de Enfermería Familiar e Comunitaria para as que, a creación de novas oportunidades neste campo, sería un incentivo para voltar (máis dun 22% das formadas na comunidade galega emigran a outras comunidades).
- Dado o actual déficit de enfermeiras, o feito de que se dispoña de profesionais motivadas e formadas para traballar nun campo en concreto diminuiría esta problemática e xa que, por outra banda, unha boa asistencia dende a Atención Primaria, como ben é sabido, diminúe as asistencias a urxencias hospitalarias innecesarias e o número de ingresos evitables.
- O aumento de residentes en formación nas diferentes áreas (só na área de Santiago de Compostela e Barbanza duplicouse) fai salientar a escaseza de profesionais especialistas coa estabilidade necesaria para titorizalos.
Polo exposto, solicitamos:
- A reconversión do 100% das prazas de enfermeira de Atención Primaria procedentes de xubilacións a prazas de especialistas en Enfermería Familiar e Comunitaria.
- A oferta de tódalas vacantes de Atención Primaria a enfermeiras especialistas en Familiar e Comunitaria.
En conclusión, reclamamos o recoñecemento da formación especializada, xa que estas enfermeiras foron formadas nos diferentes centros de saúde galegos durante dous anos para ofertar unha mellor atención a cidadanía e desa forma seguir a actual liña de mellora da Atención Primaria e lembramos que esta formación supón un custo individual de preto de 60000 euros por residente.
Non están permitidos os comentarios.